Part of "Langib" (Literary + Visual Art Exhibit)

4x4ft
Acrylic on wood
----------------------------------------------------------------------

PORTAL

Simulan sa paghanap sa kabuuhan ng sarili, ang hubog kung paano nabubuo ang isang katawan, ang bisaklat, ang gaspang, ang agwat ng dibdib sa bumbunan, ang mukha (maaaring patlang lamang). Maaari mong matagpuan ang sarili sa isang palaruan matapos mong mahanap ang sarili. Malamang, higit iyon sa pang-unawa—na bigla mo na lamang matatagpuan ang sarili sa isang lugar sa isang pagkakataon na waria’y iyon ang iyong pinagmulan. Aakalain mo na marahil naliligaw ka ngunit isa-isang magpapakilala ang mga alaala—maaaring hindi mo sila alaala—na parang matagal ka na nilang kakilala at hindi ka lamang basta bisita: ang mga bakal na nakabalabal ang kalawang at lamig, ang palikurang minsang may natagpuang duguang kawal at salawal, ang punong hinihimpilan ng isang babaeng may kilik na bata at walang mukha, ang swing na itinutulak na lamang ng hangin, isang paslit na humuhubog ng estatuwa habang nagkukulay-metaliko ang paligid, waria’y bukod pa sa iyo ay may isa pang nagmamasid. Marahil magtataka ka sa lahat ng iyong makikita—at maaaring kinapa mo ang iyong mata, tainga, balat at dila. Maaaring bigkasin mo ang ngalan ng Kaligtasan kung maramdaman mong walang kaligtasan. Maaaring kagat-kagat mo ang isa pang salita. At marahil, marahil lamang, gusto mong simulan muli ang lahat, at sisimulan mo sa pagpatay sa sarili.

-Sonny Sendon